Stjarnan - Körfubolti

Stjarnan lagði granna sína úr Hafnafirðinum 81-74 í kvöld í frekar slökum körfuknattleiksleik.

Haukar höfðu frumkvæðið nær allan leikinn en Stjörnumenn hertu vörnina síðustu 6 mínútur leiksins og taugar Hauka manna voru hreinlega ekki nógu sterkar undir lokin. Stjarnan var ekki að spila neinn glimrandi bolta í kvöld og gestirnir virtust vilja sigurinn meira en heimamenn.

Staðan í hálfleik var 41-42 fyrir þá rauðklæddu. Haukar byrjuðu síðari hálfleikinn mun betur og þegar um 3 mínútur voru liðnar af 4.leikhluta voru þeir með forustu 60-69 og virtust á góðri leið með að fara heim með 2 stig í farteskinu. Þá fór hinsvegar allt í baklás hjá gestunum og Stjörnumenn gengu á lagið. Heimamenn settu næstu 12 stig leiksins og komust þremur stigum yfir 72-69.

Áhorfendur voru nú komnir í gang og létu vel í sér heyra. Heimamenn kláruðu svo leikinn með mikilvægum stoppum undir lokin og skynsamlegum sóknarleik.

Stjarnan spilaði ekki vel í kvöld en nægilega vel þó, til að hreppa þau 2 stig sem í boði voru.

Tölfræði:

Jovan komst aldrei í takt við leikinn og náði ekki að komast á blað að þessu sinni en það kom ekki að sök ,  Marvin var heldur ekki alveg að finna sig í leiknum en setti þó 5 stig og hirti 5 fráköst.  Renato var öflugastur Stjörnumanna í kvöld með 25 stig og 12 fráköst, Justin var einnig góður og  setti niður 21 stig og gaf 9 stoðsendingar , Keith smellti niður 17 stigum og var drúgur í vörninni og Fannar átti einnig fínan leik með 7 stig og 10 fráköst.

Þrátt fyrir sigurinn, þá þurfa menn að slípa sig betur saman ef þeir ætla sér einhverja hluti gegn næstu andstæðingum, sem eru KR í DHL höllinni, en þeir hafa verið að spila virkilega vel eftir að þeir skiptu út könunum sínum og bætu við sig evrópu manni.

Næsti leikur er semsagt útileikur gegn KR, föstudaginn 10. Febrúar.

Hvetjum Stjörnufólk til að fjölmenna á þann leik.

Áfram Stjarnan!

Í kvöld, fimmtudag, fer fram heil umferð í Iceland Express deildinni.  Okkar menn fá nágranna sína úr Haukum í heimsókn.  Stjörnumenn náðu að hrista af sér jólaslenið í síðasta leik með góðum sigri á Val, en það segir því miður ekki mikið þar sem Valsliðið er því miður engan vegin á úrvalsdeildar "leveli".  Þannig að nú reynir á hvort strákarnir séu komnir á beinu brautina.  Eitt það jákvæðasta við Valsleikinn var að Jovan spilaði sínar fyrstu mínútur í marga mánuði.   Hann á ennþá töluvert í land með að ná fyrri styrk en vonandi verður hann fljótur að komast í fyrra form.  Það þarf ekkert að fjölyrða um það hversu mikill styrkur það er fyrir liðið að fá Jovan heilan til baka enda einn allra besti leikmaður deildarinnar.

Haukaliðið er sem stendur í næstneðsta sæti deildarinnar og þar af leiðandi í fallsæti, 6 stigum á eftir næsta liði.  Til að forðast fall þurfa þeir að minnsta kosti að sigra 4 af þeim 9 leikjum sem eftir eru og vona að Fjölnir tapi öllum sínum leikjum.  Þannig að hver einasti leikur þeirra er í raun hreinn úrslitaleikur.   Þeir hafa eins og flest önnur lið, með örfáum undantekningum, tekið þátt í útlendinaruglinu undanfarið og bætt við sig erlendum leikstjórnenda.  Auk hans eru þeir með 2 mjög sterka erlenda leikmenn auk ungra og efnilegra heimamanna og margir vilja meina að þeir séu með mun sterkara lið en staða þeirra í deildinn segir til um.  Þannig að þetta verður væntanlega hörkuleikur og strákarir þurfa á góðum stuðningi að halda.

það verður byrjað að grilla kl 18:15 og nú er bara að skella sér með fjölskylduna í burger.  Munið að næta tímanlega.

Undirritaður kíkti í heimsókn "heim" í Ásgarð fyrr í dag til að sjá 11. flokks liðsins, fyrrum lærisveinana, leika gegn KR-ingum. Eins gaman og það er að sjá þessa frábæru drengi spila, þá var leikurinn eins konar afsökun fyrir mann til þess að koma aftur í Ásgarðinn. Að heilsa upp á alla: Leikmenn, foreldra, starfsmenn, þjálfara og alla aðra í húsinu, var auðvitað mest spenandi.

Á leiðinni heim fór maður að hugsa og melta þessa heimsókn almennilega. Eftir þá heilaleikfimi stóðu tvö sagnorð í nafhætti eftir, sem einhverskonar niðurstaða: "að kunna" og "að meta".

Ég vona innilega að þeir leikmenn sem alast upp hjá Stjörnunni kunni að meta starfsemina sem er í gangi. Að sjá umgjörðina, alla foreldrana sem mættu til að horfa á og meistaraflokksmenn sem komu og hvöttu leikmenn var unun.

Nú skipti undirritaður um vettvang í byrjun þessa tímabils og eru því komnir ansi margir mánuðir í fjarveru frá klúbbnum. Sú fjarvera gefur manni ferska sýn á hlutina. Glöggt er gests augað - þó svo að maður sé kannski ekki beint gestur. Uppbygging körfuboltans í Garðabæ undanfarin ár hefur verið hreint ótrúleg. Starfið sem stjórnarfólkið vinnur er magnað, algjörlega magnað!

Vonin er því sú að allir sem eru í kringum klúbbinn kunni að meta það starf sem unnið hefur verið. Svona gerist ekki af sjálfu sér. Þessi uppbygging hefur kostað mikla vinnu og nákvæma skipulagningu í bland við gríðarlegan eldmóð. Garðbæingar mega allir vera stoltir af frábæru starfi körfuknattleiksdeildar Stjörnunnar. Maður fylltist stolti þegar ég gekk úr Ásgarði í dag og hugsaði: "Svona á þetta að vera!"

Vonandi fyllast leikmenn Stjörnunnar þessu sama stolti þegar þeir klæða sig í búninginn fyrir næsta leik.

Sendi ykkur góðar kveðjur frá Selfossi,

Kjartan Atli Kjartansson

Sjtörnumenn skiluðu 2 skyldustigum í hús í gær í Valsheimilinu þegar þeir unnu botnlið Valsmanna nokkuð auðveldlega 71-96. Þar með endaði 3 leikja taphrina okkar manna og vonum við að liðið sé aftur komið á rétt ról.  Sérlega var gaman að sjá Jovan nokkurn Zdravevski í búning aftur á parketinu, en hann átti prýðisleik og setti 13 stig og sýndi að hann hefur litlu gleymt í meiðslapásunni frá því í október. Teitur og Snorri róteruðu vel og flestir fengu að spila, en Renato endaði stigahæstur með 20 stig.  Hann á eftir að reynast okkar mönnum drjúgur það sem eftir er og virðist vera kominn vel inn í leik liðsins.  Keith og Marvin voru einnig sterkir ásamt flestum öðrum leikmönnum Stjörnunnar. Athygli vakti að nánast enginn stuðningsmaður Vals mætti á leikinn, en stuðningsmenn Stjörnunnar voru mun fleiri en Valsmanna, þó fáir væru.  Það virðist vera að fjara verulega undan tímanbilinu hjá Valsmönnum og eru þeir ekki líklegir til afreka það sem eftir lifir tímabils.

Góð umfjöllun er um leikinn á karfan.is hér.

Næst er leikur gegn Haukum næsta fimmtudag, og verður fróðlegt að sjá hvort Stjörnumenn taki þann leik líka, en það er ljóst að Haukarnir verða mun erfiðari viðureignar en Valsmenn, enda hafa þeir bætt við erlendum leikmanni og eru til alls líklegir.  Menn verða að mæta vel tilbúnir í þann leik og fá góðan stuðning áhorfenda.  Við hvetjum alla til að mæta næsta fimmtudag í Ásgarð og styðja okkar menn í baráttunni, nú skiptir hver leikur máli ef menn vilja ver í topp 4 í deildinni og ná heimaleikjarétti í úrslitakeppninni. 

Mynd: Jovan mætti aftur á parketið fyrir Stjörnuna og stóð sig vel.